Feeds:
પોસ્ટો
ટિપ્પણીઓ

Blessing from Dada Bhagawan..
l to R..Rameshbhai and Sirishabhai DoshI

દાદાશ્રી ભગવાન વદે….સંકલન- રમેશ પટેલ( આકાશદીપ)

દાદાએ મને પૂછ્યું ..રમેશભાઈ..આપ ઈજનેર છો.. આટલા મોટા પાવર પ્રોજેક્ટ નિર્માણમાં જવાબદારી ઉપાડી રહ્યા છો…ચાલો અંગ્રજીમાં ૯૧ થી ૧૦૦ સીધુ બોલો.

હું ફટાફટ બોલી ગયો. પછી કહે હવે ૧૦૦થી ૯૧ ઉલટી રીતે બોલો. ..તે પણ બોલ્યો. એટલે કહે- બીજી વખતે જે ધ્યાન સાથે આપે બોલ્યું તેટલું ધ્યાન સીધુ બોલવા માટે આપવું ના પડે એ સમજાયું ?

જે કામ હાથમાં લો , આધ્યાત્મિક તો એમાં મનને એટલું જ પરોવી આગળ વધજો. જગત સાથે વ્યવહારમાં જેટલી જાગૃતતા રાખીએ છીએ, તે વખતે અંદર પણ એક વ્યવહાર ઊભો થાય છે, એ ભાવિમાં ચાર્જ રૂપે આવે છે.

 

સત્સંગ…

દાદાએ ત્રણ બેટરીઓ કહેલી.મનની બેટરી, તનની બેટરી અને સ્પીચની -બેટરી.

જેટલા પ્રમાણમાં બેટરી ચાર્જ કરી હશે તેટલી માત્રામાં મન-વચન-કાયાની બેટરી ડિસ્ચાર્જ થવાના સંયોગો સહેજે બાઝવાના. સંયોગ એટલે ઉદય કર્મ. જગતની આ ફાઈલોનો સમભાવે નિકાલ કરો. થઈ ગયું જે, તેનો નિમિત્ત ભાવે જ્ઞાતા થા,અંતર કલેશ ઓછો થતો જાય તેમ આ ઉપાધિ ઓછી થતાં, આનંદ અનુભવાતો જાય. આ કળિયુગમાં

જગતમાં વેરનું પ્રમાણ ઘટાડવું એજ તમારો સાચો પુરુષાર્થ.આજે મૂછો મરડી વેર વધારતા જઈએ છીએ ને એથી જીવનની કોર્ટમાં કેસ થતા જ રહે, માટે સયંમ અને સમભાવે નિકાલ કરવા,

આત્મા અને દેહને અલગ ભાવે ઓળખો ત્યારથી તમે જાગતા થયા.

….. …………

જ્ઞાની એટલે કોણ?.. શ્રીમદ રાજચંદ્રજીએ કહેલું કે..

દેહ છતાં જેની દશા, વર્તે દેહાતીત

આ જ્ઞાનીના ચરણમાં, હો વંદન અગણિત 

આત્મ જ્ઞાન વિશે દાદાઈ ફોડ….

આત્મા એટલે ચૈતન્ય પરમાત્મા ને એના અજવાળે ઠોકરો ના વાગે. સમભાવે ફાઈલોનો નીકાલ થતો રહે. તમારો અહંકાર શેકેલા બીજ જેવો થતો જાય…કર્મ રુપે થતા બંધન

અટકે ને એ બધું અચેતન- ચેતન કહેવાય. આત્મ-જ્ઞાન નિરાગ્રહી હોય. સમક્તિ થાય એટલે પોતાની ભૂલ પોતાને દેખાય. આપણો વ્યવહાર છે એ નિકાલી છે, પકડી રાખવા જેવો નથી. વિતરાગતા આવે જેથી ના-ગમતું ચોખ્ખા મને સહેવાય જાય તેવો પુરુષાર્થ થતો જાય.

ભગવાનની ભાષા કેવી હોય?…

ખોટું ને ખરું એ જગતની ભાષા. જીવમાત્રને સુખ હો એ ભગવાનની ભાષા. એ પરમવિનય શીખવાડે- કિંચિત માત્ર હરકત ના કરે, ઊલટું તમને અહીં આગળ બેસવાની જગ્યા કરી આપે. મનુષ્યપણું શીખવે કે સામાની કાળજી રાખે એ સાચો મનુષ્ય.

મૂર્તિમાં ભગવાન છે?….દર્શન કેવીરીતે કરાય?

દાદાશ્રી…

મૂર્તિ એ ભગવાન નથી, તમારી શ્રધ્ધા જ ભગવાન છે.ભાવથી દર્શન કરો ને બોલો..

 હે વીતરાગ ભગવાન, તમે મારી મહીં બેઠા છો, પણ મને તેની ઓળખાણ નથી, તેથી તમારાં દર્શન કરું છું, જેથી મને તેની ઓળખાણ થાય. આ દર્શન વખતે ઉલ્લાસ થાયતો સાચાં દર્શન.

આને પરોક્ષ ભક્તિ કહેવાય…વિષમ પરિસ્થિતિમાં સમતા રહે ને ધીરે ધીરે ઉધ્વગતિ થાય.

જ્ઞાની ગુરુની સમીપે પ્રત્યક્ષ ભક્તિ ને ત્યાં ઉકેલ આવી જાય…એ રીયલ કેશ. આત્મા વ્યક્ત થાયને અનેક અવતારોનાં પાપો નીકાલી બની જાય. આત્મા બધું જ જાણે..વિચારોને જાણે પણ તન્મયાકાર ના થાય.

સંકલન- આધાર- અક્રમ વિજ્ઞાન

jawaharlal માટે છબી પરિણામ

Thanks to webjagat for this picture...

જવાહરલાલ નેહરુ કે જવાહરલાલ નહેરુ ભારતના સૌથી પહેલા અને અત્યાર સુધી સૌથી લાંબો શાસનકાળ ધરાવતા વડાપ્રધાન હતા, વડાપ્રધાન તરીકે તેઓએ ૧૯૪૭થી ૧૯૬૪ સુધી સેવા આપી હતી. Wikipedia
જન્મ તારીખ14 નવેમ્બર, 1889
………………………

ગાંધીજીના રાજકીય વારસદાર

સમૃદ્ધ ભારતીય બેરિસ્ટર અને રાજકારણી મોતીલાલ નહેરુના પુત્ર હોવાના નાતે નહેરુ પ્રમાણમાં ઘણી યુવાન વયે ઇન્ડિયન નેશનલ કોંગ્રેસની ડાબી પાંખના નેતા બની ગયા હતા. મહાત્મા ગાંધીના માર્ગદર્શન હેઠળ બ્રિટિશ સામ્રાજ્યમાંથી સંપૂર્ણ સ્વરાજની હિમાયત કરતા નહેરુ એક પ્રભાવશાળી અને ક્રાંતિકારી નેતા હતા. જે ધીમેધીમે કોંગ્રેસના પ્રમુખપદ સુધી પહોંચ્યા હતા. ભારતની લાંબી, સંઘર્ષપૂર્ણ સ્વતંત્રતા ચળવળમાં તેઓ એક ચાવીરૂપ, મહત્ત્વની વ્યક્તિ રહ્યા હતા અને ધીમેધીમે ગાંધીના રાજકીય વારસ તરીકે ઓળખાવા માંડયા હતા.

 તેમણે પોતાના જીવન દરમિયાન કુલ નવ વર્ષ જેલવાસ વેઠવો પડયો. પોતાના જેલવાસ દરમિયાન નહેરુએ ‘ગ્લિમપ્સીઝ ઓફ વર્લ્ડ હિસ્ટ્રી’ (૧૯૩૪), પોતાની ‘આત્મકથા’ (૧૯૩૬) અને ‘ધ ડિસ્કવરી ઓફ ઇન્ડિયા’ (૧૯૪૬) લખ્યાં. ભારતની સ્વતંત્રતા ચળવળમાં તેમની વધતી જતી પ્રતિષ્ઠા ઉપરાંત આ પુસ્તકોએ તેમને એક ઉત્તમ લેખક તરીકેની નામના પણ રળી આપી. ૧૯૨૯માં પહેલી વાર લાહોર સત્ર વખતે તેમણે ગાંધીજીના માર્ગદર્શન હેઠળ ઇન્ડિયન નેશનલ કોંગ્રેસનું સુકાન સંભાળ્યું હતું.

 ભારત જ્યારે સ્વતંત્ર થયું ત્યારે ૧૫ ઓગસ્ટ, ૧૯૪૭ના નવી દિલ્હી ખાતે સહુ પ્રથમવાર સ્વતંત્ર ભારતનો ધ્વજ લહેરાવવાનું સન્માન એકમાત્ર નહેરુને પ્રાપ્ત થયું હતું. નહેરુની સંસદીય લોકશાહીના ગુણો, બિનસાંપ્રદાયિકતા અને ઉદારમતવાદ તરફનું વલણ અને તેની સાથે સાથે ગરીબ અને વંચિતો માટેની ચિંતાને પરિણામે આજે પણ ભારત પર જેનો પ્રભાવ છે એવી નીતિઓ ઘડવા તેઓ પ્રેરાયા. તેમને ‘આધુનિક ભારતના શિલ્પી’ તરીકે પણ સંબોધવામાં આવે છે.

………………………

બાલદિન ચાચા નહેરુ….રમેશ પટેલ(આકાશદીપ)

 

 ગાવું છે રે ગીત મજાનું,  બચપણ  તારું

 આઝાદીના ઉષઃ કાળ સમ, દીપે નિરાલું

 

 ફૂલ ગુલાબી શોભે જાકીટ, હસતા પ્યારું

 દે  મીઠી  યાદું બાલદિન,  ચાચા  નહેરું

 

 દેશું  શિક્ષા ગૌરવ ઘેલા, જય  હો તારો

 તું  છે ભાવિ દેશનું વીરા, એક  જ નારો

 

 નાના નાના ભેગા થાતા,  હસતા ગાતા

 ખોળે  બેસી  છૂપા-છૂપી, બહુ શરમાતા

 

 શિશુ  ભાવે સહજાનંદી, હું દડબડ  દોડું

 પંખી મેળા આંગણ જામે, ચણ  હું નાખું

 

 તાલી તોલે તવ શ્રીમંતાઈ, વાગે વાજાં

 તારી  હસીએ હસે દુનિયા, બાળા રાજા

 

 લૂંટા-લૂંટી   ઝપાઝપી, માફ  જ  સારું

 યાદ  કરું  જન્મ  દિને ,  ચાચા  નહેરું

 રમેશ પટેલ(આકાશદીપ)

ચારુતર…

એકતા પ્રતિમા માટે છબી પરિણામ

 

મહાકાંઠાથી વાત્રક કાંઠાનો પ્રદેશ એટલે જેની ભોમકાના ફળદ્રુપ કણ કાચું સોનું કહેવાય છે, એ રમણિય ભૂમિ એ જ ગૌરવવંતી  ચરોતર ભૂમિ. મહાકવિ ન્હાનાલાલે ચરોતર ભૂમિને એટલે ‘ ગુજરાતનું પંજાબ’ કહી બીરદાવી છે. મહી, શેઢી, લૂણી, વાત્રક, મેશ્વો એમ પાંચ સરિતાઓથી, નાના ચરુ તર થઈ જાય એ જમીન એટલે ચરોતર.

  બહોળા અર્થમાં મહી અને સાબરમતી નદી વચ્ચેના રસાળ પ્રદેશને લોકો ચરોતર તરીકે ઓળખે છે અને ચોક્કસ રીતે જોવા જઈએ તો વાસદ નજીકના મહીકાંઠાથી લઈને વાત્રક નદીના કાંઠે વસેલા મહેમદાવાદ સુધીનો વિસ્તાર ચરોતર ભૂમિ કહેવાય છે[૨]ખંભાતના અખાત વિસ્તારમાં પથરાએલો ભાલ પ્રદેશ ચરોતરને અડોઅડ આવેલો છે.

આ નદીઓને તીરે વિહરવાનું અમને સૌભાગ્ય મળ્યું છે, કોતરો ને ખેતરોની લીલીકુંજો લહેરાતી, વરસાદથી હરખાતી જોઈ છે. ઉર્વરા શક્તિ ને 

જલ સીંચન સાથે પોતિકું સૌંદર્ય સાથે લહેરાતો આ સમૃધ્ધ પ્રદેશ .. એટલો સુંદર લાગ્યો કે ‘ચારુ’ – સુંદરતાનું ધામ બની ખ્યાત થયો …આજ છે આપણી ભૂમિ– ચારુતર..ચરોતર.

લોક, સમાજ, રિવાજ ને ખુમારીથી ડંકો દેતી આ પ્રજા, પેટલાદની આસપાસના ૧૦૪ ગામ કે કહો કે ખેડા જીલ્લાની પ્રજા કહો… ઈતિહાસ રચી જાણતી આ પ્રજા છે. દેશ ને પરદેશમાં પોતાના સ્વબળે, સાહસથી આગવી ઓળખ દેનાર, વતનના ગૌરવ માટે માટે ઘસાઈ છૂટનાર આ પ્રજાના જીવનનો પડઘો, લોકગીતોમાં પણ રણકતો આવ્યો છે..

આભમાં ઝીણી ઝબૂકે વીજળી રે, ઝીણા ઝરમર વરસે મેહ

બેની નહિ રે જવા દઉં સાસરે લોલ

તમને વ્હાલા તમારા સસરા રે લોલ

બાપુને વ્હાલા તમારા જીવ રે

બેની નહિ રે જવા દઉં સાસરે લોલ

 

        એક બાજુ સ્નેહ, દરિયો ખેડવાનું સાહસ ને નિખાલસ પ્રજામાંથી જ  કેમ ના પાકે રત્નો? …  આપણા  લોખંડી મનોબળવાળા સરદાર પટેલ માટે એટલે જ દેશ ધન્યતા અનુભવે  છે.  

આવો વતનની એ ખુમારીને ..Statue of Unityની ભવ્યતા સાથે ચારુતર ભૂમિને પણ બીરદાવીએ.

સંકલન- રમેશ પટેલ(આકાશદીપ)

ચારુતર... માટે છબી પરિણામ

kavi Ramesh Patel(Aakashdeep) ..ShrI Kanubhai Patel(kala-Guru)

Anand- Vidyanagara..17 May-2018

…………………………….

  • ચરોતરની ધરા…  

 

શ્વેત ક્રાન્તિ, કલ્યાણ પથીચારુ જલધરા

છે ચરોતરની ધરા , જાણે  સોના ઉર્વરા

મહી, વાત્રક, શેઢી, મહોર ને આ સાબરા

ચરોતરી ખમીરા જાણુંસાત સાગરે શૂરા

 

જ્યાં ચરણ ચારુ રત્નોના પડે, અરે મહાસાગર પણ માર્ગો ચીંધે

પૂનમની ચાંદની બની ખીલે આભે, એને કોણ સીમાડે રોકી શકે?

હૂંફાળા, કરુણાથી નીતરતા , ધન્ય પરિશ્રમી ઓ ભેખધારી તમે

જીવન મંગલ એવું જીવો, જાણે  ફોરમ વતને  અમી પૂરે

 

કલેજાં ચીરતી કંપાવતી , જીવન તડકી-છાંયડી ને વેદનાઓ  ભરી પીધી

ચરોતરી ગુર્જરી રંગ શું શું વખાણું? વિશ્વજાતિ જાણે યશકર્મી દધિચી ઋષી

રમેશ પટેલ(આકાશદીપ)

નૂતન વર્ષાભિનંદન્…વિક્રમ સંવત ૨૦૭૫ સુખ , સમૃધ્ધી ને શાંતિથી ઝગમગે….

ભાવે  ધરજો  અન્નકૂટની  થાળી

શ્રી   સબરસે   મલકી   દિવાળી

……………….

રાજા દીપોત્સવી તું………….રમેશ પટેલ(આકાશદીપ

 છંદસુવદના

રાજા દીપોત્સવી તું, સબરસ મધુરાં, પ્રાગટ્ય દીવડે

રંગોળી  આંગણેતો, તમસ  વિજયશ્રી, આનંદ વરતે

મીટાવી શત્રુતાને , હરખ સભર હો, ચૈતન્ય સઘળું

ફોડી  વ્યોમે  ફટાકા ઘર ઘર ટહુકે, ઝૂમે જ ગરવું

ધર્યા  છે  અન્નકૂટો, પ્રભુ ચરણ મહીં, છે ધન્ય ધરણી

આવો ભાવે પધારો, શુભ પથ જગ હો, ઉત્તમ કરણી

ભેટી  દે  સ્નેહ  પૂંજી, જન જન હરખે ઐશ્વર્ય ધરતો

ઝીલી હૈયે ઉજાશી, વિનય સભર આ, સંસાર ગરવો

……………………..

ઓવારણાં નવા વરસના….રમેશ પટેલ(આકાશદીપ)

(છંદ– શાર્દૂલવિક્રીડિત)

ખીલી છે રજની નભે ઝગમગી, તારે સુહાની મઢી

ને દીવા ઝબકે ગૃહે ઝળહળી, આવી જ દીપાવલી

 

દેજો  ભાવ   ભર્યા રૂડા ઉમળકા, ઉજાશ પર્વે   દિલે

વર્ષાન્તે સરવૈયું હાથ ધરજો, લાભ્યા તમે શું જગે

 

સંદેશા મંગલા નવા વરસના, ઐશ્વર્ય પામો મહા

ઊષ્મા સાથ વધાવજો જ હરખે, લેતાં જ ઓવારણાં

રમેશ પટેલ(આકાશદીપ)

……………………………………..

શુધ્ધ નયનથી વિચારતાં કેવળ અખંડ અબાધિત એક મૂર્તિ છતાં પર્યાય નયનની

અપેક્ષાએ આત્માનાં જ્ઞાન , ચારિત્ર અને દર્શન ગુણના યોગે બ્રહ્મા, વિષ્ણુ અને

મહેશ્વરરૂપ ત્રિમૂર્તિ કહી શકાય છે….વિષ્ણુ કાર્યરૂપ, બ્રહ્મા ક્રિયારૂપ અને મહેશ્વર કારણરુપ છે.

સાચો પ્રકાશ એટલે સ્વયંની જાગૃતિ અને કોઈ દોષો થાય તો ટકોર કરે એ પ્રજ્ઞા.

પ્રજ્ઞા એ આત્માનો જ ભાગ છે. આ પ્રજ્ઞાનો પ્રકાશ આત્મામાં એકાકાર થાય ત્યારે કેવળજ્ઞાન

થાય અને અહંકારનું શમન એજ મોક્ષ.આ પ્રજ્ઞાથકી જ કૃપા ઉતરે અને તે વિતરાગ નથી,

તે ‘નિકાલ’ ની ભાંજગડ લઈને આવેલી છે. કેવળજ્ઞાન થઈ પછી તીર્થંકર થાય અથવા કેવળી થાય

અને મનુષ્ય જન્મની સાચી સાધના પરમ પ્રકાશે ઝળહળે.

સંકલન….રમેશ પટેલ(આકાશદીપ)…આધાર..અક્રમ વિજ્ઞાન.

………………….

 પ્રશ્ન– બુધ્ધિએ કામ કર્યું કે પ્રજ્ઞાએ એ કેવી રીતે ખબર પડે?

 

દાદાશ્રી…અજંપો કરે તે બુધ્ધિ . પ્રજ્ઞામાં અજંપો ના હોય.

બુધ્ધિ ‘ઈમોશનલ’ જ રાખ્યા કરે, ઘડીય શાન્તિથી બેસવા ના દે.

 

પ્રશ્ન..વ્યવહાર તો બુધ્ધિથી જ ઉકેલવો પડે ને?

 

દાદાશ્રી…બુધ્ધિ એની મેળે કુદરતી રીતે જે વપરાય છે, એટલી બુધ્ધિ જ

કામની છે. બુધ્ધિ કેટલામાં વાપરવી એનું આપણે ‘ડિસિઝન’ લાવવાનું છે.

બુધ્ધિ એની મેળે કુદરતી રીતે જ ‘જોઈન્ટ’ થયેલી છે, અંતઃકરણમાં એ

સુમેળ રીતે’ જોઈન્ટ’ થયેલી છે. જો મોટા પથરા નીચે તમારો હાથ ખૂંપી ગયો

હોય તો તેને કળે કરીને કાઢી લે અને ફરી ના ખૂંપે તેટલા પૂરતી જ બુધ્ધિ વાપરવાની છે.

વિપરિત બુધ્ધિ જે ‘નેગેટિવ થોટસ’ લાવે એ જ આ સંસારમાં અથડામણ ઊભી કરશે,

એ જ આ સંસારે ભટકાવશે.

            બુધ્ધિ સર્વની ભૂલો કાઢશે, ઓરમાન મા હોય તો છોકરાને જમતી વખતે, નીચેની

ખીચડી આપે, તે નર્યો બળાપો કરાવે, અમે આવી જગ્યાએ અબૂધ થવાની વાત કરીએ છીએ.

બુધ્ધિની હાજરી હોય પણ બુધ્ધિની અસરથી મુક્ત થઈ ગયા હોય, તે અબૂધ દશા.મોક્ષે જવું

હોય તો અવળું દેખાડતી બુધ્ધિથી આઘા રહેવું. બુધ્ધિનો સ્વભાવ છે કે સંસારમાંથી બહાર નીકળવા

ના દે, બુધ્ધિને તમારા પર હામી થવા દેશો નહીં.

        બુધ્ધિ ને અહંકાર બેઉ જ્યારે વપરાશે નહીં, કેવળ જ્ઞાન દેખાયા કરશે, જગતનો બફાટ શમતો જશે

ને ખુદાઈ આનંદ , જે જ્ઞાને કરીને ક્રિયામાં આવશે, તમને આ અક્કલ ના વાપરવાના ફાયદા હાથમાં રમશે.

જય સચ્ચિદાનંદ

સંકલન…   આભાર….અક્રમ વિજ્ઞાન

……………

 

કળસૂત્રી કલદાર- ….રમેશ પટેલ(આકાશદીપ

 

ગત વર્ષને અલવિદા રે

નૂતન વર્ષને જુહાર

ટકટક કરતી હાલતી થાતી

સમયતણી વણઝાર

 

એજ સૂરજ ને એજ વસુધા

સ્વપ્ન નવલ શણગાર

દેજો આશિષ તેજ કરૂણા

વંદીએધન્ય તમે દાતાર!

 

નભ મંડળે રંગ માંડવો

શુચિ કેસરિયા રે ભોર

શીતલ લહરે ઉર ઝૂમે

કેવાં મધુરાં  કલશોર

 

રૂક્ષ રૂપલાં  ક્ષણ ઝભલાં

ઋતુ સરીખડાં ઉપહાર

ગાતા રહેજો ગીત મંગલા

છે કળસૂત્રી કલદાર

 

ખેતર વાડી ડુંગર ક્યારી

દે ખોબલે  ઉપહાર

ટકટક છોડી હાલજો તાલે

સંગેરૂડી  વણઝાર

……………….

શરણું શ્રીજીનું…રમેશ પટેલ(આકાશદીપ)

 

શોધો તો શરણું શ્રીજીનું શોધજો

આઠે પહોરનાં અજવાળાં જી રે

 

ઉગતા પહોરે વ્હાલાં પ્રભાતિયાં

વૃન્દાવન વાટે મધુ વેણુ જી રે

 

થાશે બપોરે ને ભાવની મીસરી

રાજીપો લાલજી રળનારા જી રે

 

યમુનાજીના વ્હાલ ચરણ પખાળે

રાધારાણી ભક્તિનાં ભાથાં જી રે

 

ગોધૂળી વેળા ને ઘરનાં આંગણિયાં

ઢાળશું ઢોલિયા સુખના જી રે

 

ભોળા  તે  મનના  અમે માધવજી

નહીં ભૂલવા દઈએ ગોકુળ જી રે

રમેશ પટેલ(આકાશદીપ)

………………………………………………………….

હું મંગલ શંખ બજાવું…..રમેશ પટેલ(આકાશદીપ)

 

પ્રાથી; પરમેશ્વર નૂતન વર્ષે

હું મંગલ શંખ બજાવું

એવો અવસર આપ પ્રભુ તું

આ જગમાં કઈંક કરી બતાવું

 

ના માગું  હું  નિત વસંત જ

પણ,  ભીતર  ભાવે કદી  ન સુકાઉં

ઋતુ ઋતુના ખોળે જ રમતાં

ધન્ય!  રૂપલ  ફૂલ  બની  મુસ્કાઉં

 

એવા  ઉરમાં  ભરજો  વિશ્વાસ જ

જગ સંગ્રામો ખેલી બતાવું

રાહ  ભલે  ને ઉબડ-ખાબડ   હો

તારો ઍવરેસ્ટ ચડી બતાવું

 

છોને  છોડે  તું  પર્વત  ટોચે

જલ જેમ સાગર થઈ બતાવું

થા; સારથ એક આશ જ હૈયે

પાર્થ  સમ  માનવ  જાત દીપાવું

 

એવો અવસર આપ પ્રભુ તું,

તારો ગર્વ થઈ હરખાઉં

ને મંગલ   શંખ   બજાઉં(૨)

…………..

 

‘સાધુ બેટ’ ...૧૮૨ મીટર  ઊંચી સરદાર વલ્લભભાઈની પ્રતિમા…31 October ,2018

સરદાર એટલે સરદાર..રાષ્ટ્રપિતા ગાંધીજીની આઝાદીની ચળવળના અડગ સાથી. ગુજરાતની ચરોતર ભૂમિ કરમસદ  એ તેમનું વતન. મોસાળ નડિયાદમાં  તેમનો જન્મ..૩૧ ઑક્ટોબર, ૧૮૭૫માં થયેલ.પિતા ઝવેરભાઈ ને માતા લાડબાનું આ ચોથું સંતાન એટલે આ વલ્લભભાઈ. પહેલા..સોમાભાઈ, નરસિંહભાઈ, વિઠ્ઠલભાઈ, વલ્લભભાઈ, કાશીભાઈ ને નાની બહેન દહીબા. લંડનથી બેરિસ્ટર બની  આવેલા આ દેશપ્રેમી સપૂત ધીકતી વકીલાત છોડી, ગાંધીજી સાથે  જોડાયા. આ જુવાન, એટલે બુલંદ વ્યક્તિત્ત્વ, ને લઈ લીધી આગેવાની ખેડૂત સત્યાગ્રહની.. ખેડા સત્યાગ્રહ થી બોરસદ થઈ બારડોલી ગામના ખેડૂતોને સંગઠિત કરી અંગ્રેજ સલ્તનતને પડકારી દીધી. અડગ મનોબળથી આઝાદી મળ્યા બાદ ૫૬૫ રજવાડાંને એક છત્રે લાવી ,અખંડ ભારતના શિલ્પી બની ગયા. તેમનાં પત્નિ ઝવેરબા ૧૯૦૯માં કેન્સરથી મૃત્યુ પામ્યા પછી,એકલે હાથે કુટુમ્બીજનો સાથે ,સંતાનો ડાહ્યાભાઈ ને મણીબેનને ,દેશ સેવા સાથે મોટા કર્યા. ભારતના પહેલા ગૃહમંત્રી , ઉપ પ્રધાનમંત્રી એવા નિખાલસ મુત્સદીએ ૧૫મી ડિસેમ્બરે , ૧૯૫૦માં વિદાય લીધી.

   આ જન્મદિને, પાવન નર્મદાના ‘સરદાર બંધ’ની નજીક ‘સાધુ બેટ’ પર સરદાર વલ્લભભાઈ પટેલનો   ..૧૮૨ મીટર  ઊંચી સરદાર વલ્લભભાઈની પ્રતિમા ‘  Statue of unity’   શ્રી નરેન્દ્રભાઈ મોદીના વરદ હસ્તે . આવો અખંડ ભારતના  આ સ્વપ્ન દ્રષ્ટાને વંદન સાથે વધાવીએ.

રમેશ પટેલ(આકાશદીપ) 

અડિખમ ઐક્ય પ્રતિક તું નરબંકો….રમેશ પટેલ(આકાશદીપ)  

તૂટ્યા  બંધનને ગુલામી  જ  ભાગી
 પડ્યા  ભાગલા   દેશ   બહુ જ દુખી
 અલગ  જ પાંચસો સાઠ આ રજવાળાં
 ભિન્ન     જ  ધર્મ  જાણે  સૂર સૌ નોંખા

 સ્વપ્ન  જ  ભવ્ય  રે ,વલ્લભ તમારું
 અખંડ ભારત   એ વિશ્વ અજવાળું
 કુશળ  વહીવટી   સ્વમાન   ને સોટી
 ધન્ય  ! મહા મુત્સદી  ઝીલી કસોટી

 દ્રષ્ટા  અમર  શિલ્પી   હો  વધાઈ
 વતનનું  વ્હાલ  એ  મૂડી  સવાઈ
 ગજગજ  ફૂલતી  છાતી  જ  છત્રી 
 નમું  અખંડ  મા  ભારત  ભવ્ય મૂર્તિ

  હર  ઉર   રંગ  ત્રિરંગ  નવલ જશ્ન
  ગુર્જર  લાલ   વીર ભારત   રત્ન
  યુગ  ગાંધી  તણો ઉજ્જવલ  ડંકો
  અડીખમ ઐક્ય પ્રતિક તું નરબંકો
 રમેશ પટેલ(આકાશદીપ)

ચંદ્ર તો અમૃત આપનાર છે, તેથી જ ને ‘સુધાશું’ કે ‘સુધાકર’ કહેવાય છે.

Thanks for picture to webjagat

શરદ પૂર્ણિમા વર્ષમાં આવનારી બધી જ પૂર્ણિમાથી શ્રેષ્ઠ માનવામાં આવે છે. એવી માન્યતા છે કે, આ દિવસે ચંદ્રના કિરણો અમૃત સમાન હોય છે. એક અન્ય વાત જે શરદ પૂર્ણિમાને વધારે વિશેષ બનાવે છે તે છે શ્રીકૃષ્ણનો વૃંદાવનની ગોપિઓની સાથે કરવામાં આવેલો મહારાસ. એવી માન્યતા છે કે, શ્રીકૃષ્ણે શરદ પૂર્ણિમાની રાત્રે જ રાસલીલા રચાઈ હતી.

 

રાસલીલા વાસ્તવમાં લીલા પુરૂષોત્તમ ભગવાન શ્રીકૃષ્ણ દ્વારા આપવામાં આવેલો એક પ્રેમનો સંદેશ છે. રાસલીલાનો અર્થ પૂર્ણ આધ્યાત્મ સાથે જોડાયેલો છે. એવી કહેવાય છે કે, જ્યારે શ્રીકૃષ્ણે વજ્રની ગોપિઓની સાથે રાસલીલા કરી તો જેટલી પણ ગોપિઓ હતી તેમને એવું પ્રતીત થયું કે શ્રીકૃષ્ણ તેમની સાથે જ રાસ રમી રહ્યા છે. પરમેશ્વરની અનુભૂતિ એ જ પરમાનંદની પ્રાપ્તિ .

 

ભગવાન કૃષ્ણે આ સંદેશ બાળપણમાં જ ગોપિઓ અને ગોપિઓના માધ્યમથી જગતને આપ્યો હતો. રાસલીલામાં દરેક ગોપીને કૃષ્ણના તેમની સાથે જ નૃત્ય કરવાનો અહેસાસ ઈશ્વરના સર્વવ્યાપક હોવાનું પણ પ્રમાણ છે. વજ્રમાં શરદ પૂર્ણિમાના અવસર પર આજે પણ રાસલીલાનું મંચન કરી શ્રીકૃષ્ણની લીલાઓનો આનંદ લેવામાં આવે છે. જેને રાતોત્સવ અથવા કૌમુદી મહોત્સવ પણ કહેવાય છે.

ચાંદલિયાની સાવરણી….રમેશ પટેલ(આકાશદીપ)

 

રાત ભલેને ઘોર જ અંધારી

ચાંદલિયાની સાવરણી

વાત જ માંડશું રાજ અધૂરી

વ્હાલી શરદની રાતલડી

 

નભથી નીતરતું અમૃત કેવું?

હૈયે થાતી શાતલડી

સરિતા સાગર ઝોલે રમતી

લહેરે શરદની રાતલડી

 

રમતું આભલડે દીઠું જ હૈયું

અક્ષરો  ગૂંથુ હું ભાવલડી

આભ કાનજીજગ આખું રાધા

લે રાસ શરદની રાતલડી

 

વગાડો વેણુ રાજ સુખલડા

ઝૂમે શરદની રાતલડી

રાત ભલેને ઘોર જ અંધારી

ચાંદલિયાની સાવરણી(૨)

રમેશ પટેલ(આકાશદીપ)

…..

શરદ તારું  રૂપ ખીલ્યું રઢિયાળું….રમેશ પટેલ(આકાશદીપ)

શરદ તારું  રૂપ ખીલ્યું રઢિયાળું

ચાંદલીયો મારો સાંવરો રે લોલ

 

નભે સજ્યું ધવલું અંગ પટોળું

ગગન લાગે સુખલડું રે લોલ

 

પૂનમિયો ચાંદલીયો ચમકીલો

રૂડો કાલિન્દીનો કાંઠડો રે લોલ

 

ગોપીઓને ખેલાવે ખેલે રૂપાળો

ચૌદ લોક માણે રાસડો રે લોલ

 

ભાવે ભીંજવે આજ શ્યામ છોગાળો

શરદ રાણી સોહામણી રે લોલ

 

જમો દૂધ પૌંઆ મીસરી પ્રસાદી

હૈયે  હરખનાં  હેલડાં  રે  લોલ

……………………

 

 

વિજયા દશમી.સૌને ખૂબખૂબ મુબારક… શુભ મૂર્હુત..

વિજયા દશમી..શ્રી રામચંદ્ર ભગવાને આસુરી તત્ત્વોથી મુક્તિ અપાવી, જન હૃદયને પુલકિત કરી દીધું હતું. 

આસો સુદ દશમનો તહેવાર; દશેરા; શમીપૂજનનો દિવસ. તે દિવસે નક્ષત્રના ઉદય સમયે વિજયા નામનો વખત હોય છે અને તે સર્વ કામનાઓ પૂર્ણ કરનાર છે. આ વિજયાને દિન જો શ્રવણ નક્ષત્ર હોય તો અતિ ઉત્તમ છે. રામચંદ્રજીએ રાવણ સામે અને પાંડવોએ કૌરવો સામે આ દિવસે ચડાઈ કરી હતી.  દુર્ગાએ મહિષાસુરને મારી આ દિવસે જય મેળવ્યો હતો.

………….
ભારત ભોમની ચેતના રામ માટે છબી પરિણામ

ભારત ભોમની ચેતના રામ

પરદુઃખ ભંજક ભ્રાતૃ રામ

રાજા રામ ;વનવાસી રામ,

ઋષીઓની શ્રધ્ધા તું રામ

 

અહલ્યા ને શબરીના રામ, ધર્મ ઉધ્ધારક તું સીતા-રામ

દાતા રામ ગુણી શાતા રામ, દીન દુખીયાના બેલીરામ

 

જટાયુ ને સુગ્રીવ મિત્ર જ રામ, દૈવી પથડે દોરે શ્રી રામ

ધનુષ્ય બાણે  શોભે શ્રીરામ, ધર્મ ઉધ્ધારક રઘુવંશી રામ

 

ઉઠતાં રામ સંવરતાં રામ, જનજન ઉરમાં વસતા  રામ
અભિમાનીનો અંત જ રામ, હનુમંત બોલે જય સીયા-રામ

 

જીવન મંત્ર વિભિષણ રામ, રામ સેતુનો  રામેશ્વર  રામ
ઋષી વાલ્મીકિએ જાણ્યો એ રામપંચવટીનો મીઠડો રામ

જીવન શ્રધ્ધા, જીવન સત્ય, ભારત ભોમની ચેતના રામ
ભલો રામ,મારો ભોળો રામ, અજર અમર પદ દાતા રામ

………………….

 ધન  ધન તમારી ઠકુરાઈ.…..

 

જાગી  પુનઈ  પ્રગટી  વડાઈ

રઘુકુળ રીતિ વચન સચ્ચાઈ

રામજી, ધન ધન તમારી ઠકુરાઈ

 

 

અભયદા   સિયારામ   સુભાષી

રાજધર્મની   શોભા    છલકાઈ

પિતૃ-બંધુ ધર્મની દીપી ખરાઈ

રામજી, ધન ધન તમારી ઠકુરાઈ

 

 

ધીર  વીર    વત્સલ   સુહાસી

વચનકાજ   હાલ્યા   રઘુરાયી

કેવટ  પામ્યો  ભવ   ઉતરાઈ

રામજી, ધન ધન તમારી ઠકુરાઈ

 

 

ઋષિ  વનવાસી  સૌ  સુભાગી

વનપથે  વિચરે  પૂણ્ય કમાઈ

યશોધર શુભંકર ધર્મ ધુરંધર

દશાનન  સંગ   છેડી  લડાઈ

 

 

રામજી, ધન ધન તમારી ઠકુરાઈ

રામ  લખન  સુગ્રીવ  હનુમંતા

ભરત  શત્રૃઘ્ન  ભાઈ બલવંતા

અવધ ઝીલે વિજયઘોષ દુહાઈ

 

ઋષિ   વાલ્મિકી   ગાયે   ચતુરાઈ

રામજી, ધન ધન તમારી ઠકુરાઈ

શેરડીના સાંઈબાબાએ ૧૦૦ વર્ષપૂર્વે વિજયા દશમીએ સમાધિ લીધેલ.. 

જન્મ – ૨૮ સપ્ટેંબર ૧૮૩૫

સમાધિ- ૧૫ ઓક્ટોબર ૧૯૧૮…૮૩ વર્ષ

 પિતા-બ્રહ્મા ને માતા-પ્રકૃતિ…એવો ઉત્તર સૌને આપતા

સબકા માલિક એક…શ્રધ્ધા ને સબૂરી

narendra modi સાંઈ સમાધિ માટે છબી પરિણામ