Feeds:
પોસ્ટો
ટિપ્પણીઓ

Archive for ઓગસ્ટ 7th, 2017

શ્રાવણી પૂનમ…રમેશ પટેલ(આકાશદીપ)

શ્રાવણી પૂનમે હસતા ઉપવન
સ્નેહ  સુમનથી  મહેંકે આંગણ
આંખ   ધરે   પ્રેમ  મોતીના    થાળા
કે આજ ખીલ્યા પૂનમના અજવાળા

ફૂલ  હસે ને હસે બહેનડી
તારા હસે ને હસે ભાઈલો
છલકે સ્નેહ સરોવર સારા
કે આજ ખીલ્યા પૂનમના અજવાળા

વરસ્યા ઝરમર મેઘ આભલે

બે    હૈયાં   હરખરસ    ઢોળે
મિલન મધુરાં મોંઘાં ભાળ્યાં
કે આજ ખીલ્યાં પૂનમનાં અજવાળા

રેશમનો  દોરો સ્નેહનો ગોટો
ભાલે તિલક કરી હેતે બાંધ્યો
આરતી  કરે  સ્નેહ    ફૂવારા
કે આજ ખીલ્યા પૂનમના અજવાળા

ખોલ  રે  વીરા  હસતું   મુખ
આશીષ પ્રસાદે ઓવારું સુખ
જુગજુગ જીવજો ભાઈલા મારા
કે આજ ખીલ્યા પૂનમના અજવાળા

મંગલ જોડી ભાઈ બહેનની
વીરો  પૂરસે   આશડી તારી
છલકાવું   અમર  પ્રેમના   પ્યાલા
કે આજ ખીલ્યા પૂનમના અજવાળા

રમેશ પટેલ(આકાશદીપ)

………………………………………………………………………..

આવી રૂડી રક્ષા પૂનમ…..રમેશ પટેલ(આકાશદીપ)

 

હાલો જઈએ વીરાને દેશ

આવી   રૂડી  રક્ષા પૂનમ

 

અક્ષત કુમકુમે સજી રે થાળી

પ્રગટાવી પ્રેમે દીવડી નાની

 

આજ છલકે ગુલાબી મન

આવી  રૂડી   રક્ષા  પૂનમ

 

લેશું ઓવારણાં ઉતારી આરતી

આશીષ દેશું બાંધી આ રાખડી

 

ના ખૂટે આ આયુષ્યનું ધન

આવી   રૂડી   રક્ષા    પૂનમ

 

ભાવે   ભીંજાયા  મારી ઓ બેનડી

અણમોલ સ્નેહની મીઠી તું વીરડી

 

છલકે અમર સ્નેહની સુગંધ

આવી    રૂડી    રક્ષા   પૂનમ

 

રમેશ પટેલ(આકાશદીપ)

Read Full Post »