Feeds:
પોસ્ટો
ટિપ્પણીઓ

Archive for ડિસેમ્બર 12th, 2014

 

 

ગુજરાતી સાહિત્યના જાણીતા કવિશ્રી ત્રિભુવનદાસનાં પુત્રી , પુષ્પાબેન વ્યાસનો, પ્રથમ કવિતા સંગ્રહ’ નિંભાડો, પ.પૂ .મોરારિબાપુની પ્રેરણાથી બહાર પડ્યો. કવિયત્રીની લય માટેની હથોટી ને કાવ્યસૂઝ, સાચે જ  વારસામાં જ ઉતરી આવેલી જણાય છે. આદરણીયશ્રી સુરેશભાઈ દલાલને ખૂબ જ ગમેલી એક કવિતા વાંચવા મળી, આવો તેની મીઠાશને આપણે સૌ ઝીલીએ… કવિતા સાથે જ કસબ વણાયેલો લાગે જ…ગ્રામ્ય જીવનની શૈલી, હૈયે રમતા પ્રભુ ભાવ..કેટલા સહજ રીતે અંદરથી વહે છે…હરિ તારા હજારો નામ…ઠામ..કયા નામે લખવી કંકોતરી.

Thanks to webjagat for this picture.

નજર કરું ત્યાં નારાયણ ….

નજર કરું ત્યાં નારાયણ ને, હાથ  ધરું ત્યાં હરિ

પગ મૂકું ત્યાં પુરુષોત્તમ ઘર, એ ઘરમાં હું ઠરી

હૈયા  દૂબળી  હું  ને પાછીમોઢે  મોળી  ખરી

દીવો પ્રગટ્યો ત્યાંતો, ટવરક-ટવરક વાતું કરી

 

ઘંટી,  પાણીવાસીદું   ને,   ચૂલો   ઘરવખરી  

જ્યાં જ્યાં કામે લાગું ત્યાં ત્યાં, મંદિર ને ઝાલરી!

      ભવ ખેતરને ખેડી રાખ્યું, કૂવો કાંઠા લગી

મેં  તો  વાવી જાર, પાક્યાં  મોતી  ફાટું  ભરી!

 

અણસમજીમાં જે કંઈ વાવ્યું, બાવળ કે બોરડી

        પાછું વળી જો ત્યાં તો આંબાને મંજરી!

પોથી ,પુસ્તક, શાસ્ત્ર પુરાણો, સાવ જ કાચી ઠરી

      ઢાઈ અક્ષર ધાગો કાઢું તેની તકલી ભરી!

 

આંગણ વાવું કદંબીયો ને, ઘટમાં યમુના ભરી

     પંડ અમારું વાંસલડી ને ફૂંક વાગશે ફરી!

પુષ્પા વ્યાસ

…………………………..

ભારત ભૂમિ….રમેશ પટેલ(આકાશદીપ)

વતન  તારી  મહેક  મધુરી મન ભરીને માણું

સરોવર પટે કંકુવરણું , પ્રભુનું પ્રભા પાથરણું

 

શુભ  સવારે ઘંટારવે , નયન નમણાં  બીડું

આનંદની એ પરમ ક્ષણોને, ભાવે ઉરે ઝીલું

 

જન્મભૂમિ  નમું,  ચઢાવી  ધૂળ  શિરે   સોહાવું

પ્રકૃતિ ખોળે પરસેવાથી, નિત ધરતી સીંચાવું

 

સંત સરિતા પુનિત તીર્થોના, પ્રસાદ પ્રેમે પામું

પ્રેમ કરૂણા ને સદાચારે, આ મંગલ જીવન માણું

 

અબોલા જીવોને રમાડી સુખડે, આંખડિયું ને ઠારું

અંતરે વસતા આ રામજીને પરસુખે હસતા ભાળું

 

ઋણાનું બંધે પુરુષાર્થે પાંગરી, આંસુને  અજવાળું

ભાગ્ય સથવારે આત્મ ચિંતને, અવિનાશીને ખોળું

 

વતન ચહું, માનવ ગરિમાથી મમ અંતરને ઉજાળું

ભારત ભૂમિ ચિરકાળ હરખે, દલડે તને નિત રમાડું

રમેશ પટેલ(આકાશદીપ)

Read Full Post »