Feeds:
પોસ્ટો
ટિપ્પણીઓ

મે, ૧૯ ૧૯૭૨ ના મંગલ દિને , અમે  સપ્તપદીના મંત્ર ગુંજન સાથે અમારા દાંપત્ય જીવનનો શુભારંભ કર્યો. જીવનના રથને સંસાર ક્ષેત્રમાં વિહાર કરાવતાં , આજે મે ૧૯, ૨૦૧૯માં  સૌ કુટુંબીજનો ને મિત્રો સાથે , સાનંદ સહભાગી થવામાં સદભાગી થયા છીએ… એ પ્રભુકૃપા છે. આજના આ મંગલદિને આપ સૌને અમારા જય યોગેશ્વર.

‘આકાશદીપ’ બની આવો ટહુંકીએ….

સવિતાબેન …રમેશચંદ્ર

લગ્નતિથિના ગુલાલે ગુંજે ગુંજન… રમેશ પટેલ(આકાશદીપ)

 

દૂર  ડુંગરીયે  કોકિલ  કવન

ઝીલી અષાઢી મ્હેંકે  જીવન

સપ્તપદીનાં  પાવન   ગુંજન

ઝીલી ટહુકો ટહુંકાવું રે મન

 

ભીંના ઝરુખડે ઝૂમે જોબન

ગાજે છે શ્યામ  મેઘો ગગન

ઝીલી ટહુકો ટહુંકાવું રે મન

 

રીસામણાં  મનામણાંના  વન

જાણે ઝૂમે ઝાડવાં ઝીલી પવન

સથવારે શોભ્યાં આંગણ ઉપવન

ઝીલી ટહુકો ટહુંકાવું રે મન

 

અનુભવે  ખીલવ્યાં  રે  ઓરતાં

ઝૂલ્યાં જીવન માંડી નવી વારતા

કુટુંબ   કલરવે   ગુંજ્યાં   ચમન

ઝીલી  ટહુકો  ટહુંકાવું રે  મન

 

વહ્યાં  વરસો  અણમોલ

વ્હાલે વર્ષા વાસંતી દોલ

સંગસંગ સરગમ સજી રે સજન

ઝીલી  ટહુકો ટહુંકાવું રે  મન

 

લગ્નતિથિના ગુલાલે ગુંજે ગુંજન

ઝીલી  ટહુકો  ટહુંકાવું  રે મન

રમેશ પટેલ(આકાશદીપ)

માવતર મીઠડાં વાત્સલ્ય…

Kashiba

પ્રગટ દેવ…..રમેશ પટેલ(આકાશદીપ

 

  પૂષ્પ ખીલ્યું તે પિતાજી
ને સુગંધી તે માતારે

આ ઊંચા પહાડ તે પિતાજી
ને સરવાણી તે માતારે

આ અષાઢ ગાજ્યા તે પિતાજી
ને ધરતી મ્હેંકે તે માતા રે

આ સાગર ઉછળે તે પિતાજી
ને ભીંની રેત  તે માતા રે

આ ત્રિપુંડ તાણ્યું તે પિતાજી
ને ચંદન લેપ તે માતા રે

આ કવચ કૌવત તે પિતાજી
ને  મમતા ઢળી તે માતા રે

આ ઢોલ વાગ્યું તે પિતાજી
ને શરણાયું તે માતા રે

આ ધ્રુવ તારો તે પિતાજી
ને અચળ પદ તે માતા રે

આ પ્રગટ દેવ તે પિતાજી
ને પ્રભુ પ્યાર તે માતા રે

આ અહોભાવની આરતજી ને

ઉર મંગલા શાતા રે

………………………

49) મમતાના મોલ

અષાઢી મેઘ ગજાવે અંબર, માડીની મમતાના મેઘ અનરાધાર
જનનીના ચરણોમાં જગના કલ્યાણ,તારી આશિષે રમતો સંસાર

નાજુક હૈયું જાણે પુષ્પ્ની પાંખડી, એના અંતરે સ્નેહની સુગંધ
સાંભળી મા કંઠે હાલરડાંના બોલ, ઊભરતા ઉરે ઉમંગ નિર્બંધ

સાગર સરીખાં માનાં હેતડાં, ઝૂમતી જીંદગી ઝીલી નવરંગ

સંતાનો કાજે ઝીલી દુઃખડાં, માવતરે મહેંકાવ્યાં જીવનના રંગ

ઉપવનમાં ખીલે રંગી વસંત જેમ, મુખે રેલાતી ભાવનાના રંગ
રમે ચાંદની છોડી ગગન એવા, ભાળ્યા છે  માના શીતલ રૂપરંગ

માની હથેલીની અમૃત થાપલી,પૂરે સંસારે સંસ્કારના ઓજસ
માડીના લાખેણા લાડે રમે, નિઃસ્વાર્થ પ્રેમના અનંતો ઊજાશ

કરુણાના સાગરથી છલકતું મુખ, અખિલ બ્રહ્માંડના મળિયાં છે સુખ
માના અધરે રમતી મમતાએ, ભૂલ્યા અમે દુનિયાના દુઃખ

સ્વાર્થી દુનિયામાં મા છે વિરડી, તારી મમતાના મોલ અણમોલ
મા જશોદાને ખોળે ભૂલ્યોતો શામળો, વૈકુંઠના વૈભવના તોલ

………………….

50) માનું હૈયું—–

હેત  ભર્યું   છે  માનું  હૈયું

નિત હરખતું જોઈને છૈયુ

 

દીકરી આવી માને મળવા

પૂછતી   હોંશે શું છે  ખાવું?

યાદ આવે  મા નાસ્તા થેલી

તું  ભરી  દેતી કોલેજ  કાળે

ભૂલતા નાનો સ્કાફ અમે તો

દોડતા  પપ્પા  યાદ  કરાવે

વાંચતા  પોઢી  જાતા  અમે

વ્હાલથી શીરે ચાદર ઓઢાડે

યાદ આવે મા બચપણ  હવે

આજ  ગૃહસ્થી  આવી  માથે

ભાગતી દોડતી જીંદગી વચ્ચે

આજ  શોધું એ  ચા  ને થાળી

માવતર સમ ના બીજા ખજાના

જીંદગી  ના  સાચા જ  વિસામા

………………………………

51) માવલડી….

તું રે માવલડી ચંદન તલાવડી
જગની તરસ્યું છીપાવે જી રે

બા બોલું ને ઝૂલે રે બાળપણ
આયખે કેસર ઘોળે જી રે

માનો તે ખોળો પ્રેમનું પારણું
સ્વર્ગનો લ્હાવો લૂંટાવે જી રે

જનનીનું હૈયું ધરણીનું ભરણું
નિત નિત વ્હાલે વધાવે જી રે

અમી વાદલડી વરસે નયનોથી
જીવનમાં તૃપ્તિ સીંચે જી રે

તારી તપસ્યા ત્રણ લોકથી ન્યારી
દિઠું ઋણી જગ સારું જી રે

મા ને ખોળે ઝૂલ્યા જાદવજી
વૈકુંઠના સુખ કેવા ભૂલ્યા જી રે

પૂજું મા તને ચરણ પખાળી
તુજ દર્શનમાં ભાળ્યા જગદમ્બા જી રે

…………………………….

52) મા તારી મમતાઈ…………

હાથ ફરે મા હેતે શીરે
પામું સકળ સુખવાઈ
ખોળે રમવું તારા મા એ
જાણે વૈકુંઠી ઠકુરાઈ

વ્હાલ તમારા મા લાખેણા
સાચી પ્રેમ સગાઈ
ઘડી તને મા; દે વિધાતા
સ્વર્ગ તણી હરખાઈ

સૂરજ સોમ શાખડે ઝૂલે
મા તારી મમતાઈ
આંખલડી મા તારી જાણે
ગંગાની નીતરાઈ

દે હોઠો આશિષ મા જ્યારે
દૂર રહે વિકટાઈ
જગ શીરેથી ના ઉતરે એ..
મા તારી ઋણ ઉતરાઈ(૨)

………………….

53) મા ચંદન અગિયારી…..

 

મા મમતાનું મંગલ મંદિર

જગ  આખું પૂજારી

વાત્સલ્ય મૂર્તિ ઘડી પ્રભુએ

ધન જનની ખુમારી

 

વૈભવ માનો હેત ખજાનો

 સુખદાતા કલ્યાણી

આંખ અમી તો સાગરપેટાં

અક્ષય મા દાતારી  ….જગ  આખું પુજારી

 

હાલરડાં  મા તારાં ઔષધ

ખોળે સ્નેહ સમંદર

તું પકવે મા મોતી મોંઘાં

ઝીલતી ઝોલે નીંદર

 

કેમ રમે મા શામળ ખોળે

જાણું હું અલગારી

ત્યાગ મૂરત તું, મા દેવી તું

મા ચંદન અગિયારીજગ  આખું પુજારી

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

54) લખતી મા તું વસિયત….

 

એક વિધાતા બીજી માતા

ધન્ય જ ભાગ્ય સવૈયા

ઉતારે  ના  ઉતરે  એવાં

ઋણ   તારાં  મૈયા

મઘમઘ થાતું  હૈયું  તારું

ઝીલે  શૈશવ  ન્યારું

હાલરડાં એ મીઠાં મોંઘાં

હૂંફ  ભરે  ભવ સારું

માત તમારો ધર્મ જ એક

સમર્પણ  ને  સેવા

તું  ઘડવૈયા  વિભૂતિની

પાલવડે તવ મેવા

કાગળ  જેવા  કોરા  અમે

લખતી મા તું વસિયત

કેમ ન માના ચરણ પખાળું

વૈભવ ધરતી રળિયત

મધુરમ અમૃત પાન જ મા તું

પ્રગટ થયું ઘર તીરથ

ઈશ્વરની  તું   આપકળા  મા

ધન્ય જ સંસાર ગરથ(૨)

…………………………….

55) હૈયાની હાટડી….

મૂઠી જેવા હૈયાની હાટડી
માંડતી લાખેણા વેપાર
ખીલે જો કળા સોળે સાહેબજી
ઝીલીએ ઝાઝા જુહાર

વાલીડા ભલે વર્ષો  થોડું થોડું
જાશું રે ભીંજાઈ રોમરોમ
ધરા જેવાં જ હેતડાં ઉછાળી
માણશું વરસાદની સોઢમ

આભે ભર્યાં રે મનડાં અમારાં
ઝગમગતો રૂડો આ સંસાર
નહીં રે જડે જોડ તારી માવલડી
ખોળતો ખોળો રમવા દાતાર

વીણા હરખની હૈયે રે મઢશું
લાખેણું લાડલું અંતર
સાગરસા દિલડાની વાતો ન્યારી
નિતનિત વગાડતું જંતર

…………………..

56) હો માત અમે પીધા મમતાના રે ઘૂંટ……

મા તારા હૈયામાં  મસ્તીથી ગાજંતા ગાજંતા દીઠા અષાઢી રે મેઘ,

…………………………………….મા અમે દીઠા અષાઢી રે મેઘ.

ને ધન્ય અમે…(૨)

લાલ થઈ  ઝીલ્યા એ ધસમસતા પૂર ….ઓ માત અમે ઝીલ્યા એ ધસમસતા પૂર

….હો માત અમે પીધા મમતાના રે ઘૂંટ (૨).

 સાગરના  હિલોળે જ લહેરાતા લહેરાતા..સૂણ્યા અમે  હાલરડાંના બોલ

…………………………..માડી અમે ઝીલ્યા હાલરડાંના બોલ

ને માડી ઓ માડી….

એ બોલે જ ખીલ્યા  બાળપણ…ને લાલ થઈ માણ્યા એ મઘમઘતા સંપૂટ….

હો માત અમે પીધા મમતાના રે ઘૂંટ(૨).

હે માત  તારી(2)

હથેલીની થાપલીમાં ઘોળ્યા રે ઘોળ્યા રે… લાખેણા લાડના રે કુંભ

……………રે માડી તેં ઘોળ્યા લાખેણા લાડના રે કુંભ

એ ઝીલીને અંગ અંગ મહેંક્યાં જ…મહેક્યાં જ..

……………..ને વ્હાલ ભરી ચાખ્યા કસુંબલ રે ઘૂંટ…

….હો માત અમે પીધા મમતાના રે ઘૂંટ.(૨)

હે મા તારાં અધરોની ચૂમીમાં ઘોળાતી ઘોળાતી ..ઝીલી અમે સ્નેહની સુગંધ

…………..હે માત અમે ઝીલી રે સ્નેહની સુગંધ.

ને ભલી ચૈતન્ય સૃષ્ટિના રંગે ઉમંગે….લાલ થઈ ચાખ્યા જ અમૃતના ઘૂંટ….

હો માત અમે પીધા મમતાના રે ઘૂંટ(૨).

સ્વાર્થી જગતમાં મા તું જ એક વિરડી…સંસારે ઝગમગતી આશ

………………..રે માડી સંસારે ઝગમગતી આશ

કેમ જ ભૂલું ઓ જનની જશોદા(૨)

રે ભાગ્ય લઈ કોણ આળોટ્યું આંગણની ધૂળ…ને વસુધાએ માણ્યાતા બ્રહ્રમાંડી સુખ….

હો માત અમે પીધા મમતાના રે ઘૂંટ(૨)

……………

 

 

ગુજરાત ગૌરવ દિવસ’ એટલે કે– ૧લી મે ગુજરાત રાજ્યનો સ્થાપના દિવસ. ઈ.સ. 1960.. મુંબઈના દ્વિભાષી રાજ્યમાંથી અલગ  ગુજરાત રાજ્યની સ્થાપના  …આપણા મૂક સેવક ને  રાષ્ટ્રપિતા મહાત્મા ગાંધીબાપુના, આઝાદી આંદોલનના સક્રીય સેનાની એવા, પ. પૂજ્ય રવિશંકર મહારાજના હસ્તે,  મંગલ દીપ પ્રગટાવી, રાજ્ય સ્થાપનાનો શુભારંભ થયો.  સાબરમતી આશ્રમની પવિત્ર ભૂમિમાં થઈ ત્યારથી..  જય જય ગરવી ગુજરાત”..એજ ગુર્જર મંત્ર હૈયે રમે  છે.

. રમેશ પટેલ(આકાશદીપ)

…………………

જયહો ! ગુજરાત  ગાજે  ગગન… રમેશ પટેલ(આકાશદીપ)

 

મલકે મલક  હર આંગણ ઉપવન

અમર  ઐતિહાસી  સાબર  દર્શન

પહેલી  મે  આજ  નાચે  જનજન

જયહો!   ગુજરાત  ગાજે   ગગન

 

ઈન્દુ   રણહાકે   ફૂંકાયા   પવન

ઋણ  શહીદોનું   જ  હૈયે  રતન

ધરી  હેત  ઉરે  ઝુલાવું   વતન

ઝગમગ દીપ  શુભ દાદા વચન

જયહો!   ગુજરાત   ગુંજે  ગગન

 

ધન્ય!  આરાસુર  પાવો  પાવન

ગઢ  ગિર  ડણકે સાવજ રતન

શ્રીજી;  સોમ  ને  સમંદર દર્શન

ગુંજે દખ્ખણ કુંજ કોકિલ કવન

જયહો!  ગુજરાત  મારું  વતન

 

સત્તાવન  સરિતા સીંચતી  જલધન

નર્મદા  જલધોધ  નવયુગ  તીરથ

થનથન  નટરાજ  મયુર  ને  મન

મધથી મધુરું વલ્લભ-ગાંધી જતન

જયહો!   સર્વધર્મ  ગજગજ  નમન

 

 

ધન્ય!   શ્વેતક્રાન્તિ   ઉત્સવ   અમન

ગુર્જર  ખમીર  રમે ;વિશ્વ  જ  વતન

ગુર્જર  અસ્મિતા  અમ  મુગટ કનક

જયહો!   ગુજરાત    ગાજે   ગગન

 ………….

રાષ્ટ્રધર્મ એટલે લોકશાહી માટે ચૂંટણીમાં મતદાનનો દેશહિતમાં ઉપયોગ. વિકાસ, આતંકના પોષક તત્ત્વો, આંતર રાષ્ટિય દાવપેચ, કુસંપનાં કુઠારાઘાત, વતનનાં સાચાહિતોને નેવે મૂકી રાજ રમતો કરતા તકવાદીઓ, એ સઘળા તત્ત્વોનું વિશ્લેશણ કરી , યોગ્ય પક્ષને બહુમતિ આપો તો દેશ મજબૂત બને… એ ફરજ મતદાનથી બજાવો.

રમેશ પટેલ(આકાશદીપ) 

………….

જયહિન્દ! જય તારો..રમેશ પટેલ(આકાશદીપ)

આજ થનગને જોમ અમારું

સ્વાધિનતાનો નારો

ગર્વ  ધરીને  ફરક ત્રિરંગા

જયહિન્દ! જય તારો

 

શૌર્ય અમનને રંગ ધરાના

અંગ  ત્રિરંગી  શોભા

ચક્ર  પ્રગતિનું  દે  સંદેશા

નિત ખીલશે રે આભા

 

કિલ્લા લાલે ઝીલ સલામી

કોટિ  હસ્ત  રણભેરી

સાગર, ડુંગર વ્યોમ સવારી

શિર  સાટે બલિહારી

 

રાહ અમનની ચીંધે ગાંધી

યુગયુગની કલ્યાણી

રિપુ થયા તો ઊઠે આંધી

દેશદાઝની    વાણી

 

 

 

વતન તણી  હૈયે ખુમારી

ઋણ  ચૂકવશું ધરાના

મા  ભારતના  ભવ્ય લલાટે

ધરશું યશ અજવાળા()

……………….

नया विश्व….रमेश पटेल(आकाशदीप)

 

आओ युवाओ मिलकर बनाये, एक नई तकदीर

दिलमें  भरकर  प्यार ,  ढूंढे  नीत नयी मंझील

 

नयें   होंश  से  सीना   ताने,  गाये  गौरव  गीत

कदम से कदम मिलाके यारों, लौटेंगे  लेके जीत

 

कैसे  निराले ये सागर  सूरज, पावनकारी  संबंध

बनकर  छाये मेघ विश्व में, बरसाये  शुभ उमंग

 

व्योम द्वारे निगाहे ठहराके , खोजेंगे नयी  सृष्टि

करेंगे जीभर प्यार प्रकृतिसे , पायेंगे प्रेमकी वृष्टि

 

गांधी विचारके बनके प्रहरी, झीलेंगे सत्यकी छाया

विमल दिलसे हरदिन जीकर, जोडेंगे सबसे नाता

 

सजायेंगे अहिंसासे नया जमाना, अभय मंत्र वरदान

नया   भारत   नये   विश्वकी,  देंगे   एक   पहेचान 

 

रमेश पटेल(आकाशदीप)

…………………..

ચટપટી  ચૂંટણી…..રમેશ પટેલ(આકાશદીપ)

આવી  છે  ચૂંટણી  ને જામ્યો  છે  જંગ

ઉમેદવારના   ઉરમાં   ઉછળે    ઉમંગ

પક્ષા-પક્ષીના     ભારે   મંડાશે   ખેલ

ભોળાને    ભરમાવશે   ચાતુરી  ચાલ

વાતોની  વડાઈથી  સૌ  કરશે ચતુરાઈ

દિવાસ્વપ્નોમાં  નીરખાવસે  સચ્ચાઈ

મત   છે  કીમતી  ન  થાશો અજાણ

રૂડા  રાજ-કર્તાઓ જ કરશે કલ્યાણ

 

મા ભોમે ગાજ્યો છે આજ મહામૂલો જંગ

ચાલો  ચટપટી ચૂંટણીમાં રેલાવીએ રંગ

રમેશ પટેલ(આકાશદીપ)

 

ચૈત્રસુદ પૂનમ….શ્રી રામભક્ત હનુમાનજીનો પ્રાગટ્ય દિવસ….સંકટ મોચન ..અનન્ય ભક્તિ ,જ્ઞાનના સાગર ને અતુલબલિ પરાક્રમી એવા જય જય શ્રી હનુમાનદાદાના ચરણોમાં ભક્તિપૂર્વક વંદન.

…………………

 

અંજનીજાયો..હાલરડું

પારણે   પોઢેલ  બાળ  મહાવીર  ને સિંહણ જાયો છે વીર
જડે   નહીં  જગતે  જોટો ,  અવનિએ   અવતરીયો  મોટો
કેસરી નંદનને નીંદરું  ના આવે, માત અંજની હેતે ઝુલાવે

ઉર પ્રસન્ન  ને આંખ મીંચાણી, અંજની  માને સપનું દેખાણું
ભાગ્યવંતી મા ભારત ભૂમિ, દે પવનદેવ  લાખેણું નઝરાણું

માત થાશે તારો લાલ બડભાગી

દેવાધી    દેવની    દેવ    પ્રસાદી
ધર્મપથી   શક્તિ  ભક્તિની  મૂર્તિ

પરમેશ્વરની  નિત   બાંધશે પ્રીતિ

ભવ કલ્યાણી અંજની નીરખે,  હરખે  ઉર આનંદે  મલકે
કેસરી નંદને નીંદરું ના આવે,  માત અંજની હેતે ઝુલાવે

પોઢંતો પ્રતાપી   વજ્રની શક્તિ

મુખ લાલી ની  આભા છે પ્યારી
જડી બુટ્ટી રામની જાણશે જ્યારે

ચારે   યુગનો    થાશે    કલ્યાણી

ભક્ત ભગવાનનાં મિલન થાશે, ભગવદ શક્તિનો સથવારો થાશે
વીર  કેસરીની ગર્જનાઓ ગાજશે ,  દશે   દિશાઓ   હાંકથી   કંપશે

દેવી  કલ્યાણી  અંજની   નીરખે

અમી રસ અંતરના ભાવે ઉછળે
કેસરી  નંદને  નીંદરું  ના આવે

માત   અંજની  હેતે  ઝુલાવે

લાલ તારો  મા લાંધશે જલધિ, પવનવેગી  એ  ઘૂમશે અવની
હિમાળેથી સંજીવની લાવશે ઊડી, અવધપૂરી ગાશે ગાથા રુડી

પનોતી પાસ ન ઢૂંકવા દેશે

રામ  ભક્તિથી  અમર  થાશે
કેસરી નંદને નીંદરું ના આવે

માત અંજની હેતે  ઝુલાવે

રમેશ પટેલ(આકાશદીપ)

………………….

નથી ભાળ્યું વિશ્વે પવનપુત્રરમેશ પટેલ(આકાશદીપ)

છંદ- શિખરિણી

નથી ભાળ્યું વિશ્વે પવનપુત્ર
અમાપા સામર્થ્ય, પવનપુત્ર , તવ સરિખું
બળી બાળા વેશે, ગતિ ગરૂડની, સૂર્ય ગરિમા
નમીએ નિષ્ઠાને, શિર શિવકૃપાધન્ય સુત તું

ચતુરાઈ શાણી
રચ્યો  મૈત્રી  સેતુ,   ઉત્તર-દક્ષિણેરામ  મિલને
લઈ  મુદ્રા મળ્યા, જલધિ  છલંગે, માત   જનની
જલાવી લંકાને , અસુર શક્તિ વિલયે, વીર વચને

રટે સ્તુતિ દેવા
રમો સંગ્રામેતો, વજ્ર ખડકસા, યુધ્ધ નિપુણા
રચ્યો રામ  સેતુ, તરલ ખડકે, નિલ  નલથી
સંવારી મારૂતીવિજયકૂચથી, રામ  ગરિમા

અતિ સંહારી છે, કપટ અસુરો, ઈન્દ્રજીતસા
સંકટ ઘેરાયા, મૂર્છિત જ બંધુ, ઔષધિ હિમે
મૃતસંજીવની સહગિરી લઈ, આવ્યા પ્રભાતા

મહા ભાગ્ય દેવા, સુયશ લહરે, રામ  મુખથી
તમે ભ્રાતા મારા, ભરત સમ હા!, ભેટુ ઉરથી

ચિરંજીવી દેવા
ન તોલે તોલાય, વિમલ સુયશી, અષ્ટ સિધ્ધિ
અજીતા આલોકે,
ગઢી ગૌરવી તું, અવધપુરમાં, રામ સુખથી

……………..

પાવન પ્રાગટ્યની તિથિ…ચૈત્ર સુદ નવમી.

શ્રી રામનું માટે છબી પરિણામ

Thanks to webjagat for the pictures

ભારત ભોમની ચેતના ભગવાન શ્રી રામનું અયોધ્ધા ધામમાં પ્રાગટ્ય ને છપૈયામાં શ્રી ઘનશ્યામ એટલેકે શ્રી સ્વામીનારાયણ ભગવાનનું પ્રાગટ્ય. 

સૂર્યવંશી ઇક્ષ્વાકુ કુલોત્પન્ન અજ રાજાના પુત્ર દશરથને કૌશલ્યાથી વિષ્ણુના અંશથી થયેલ પુત્ર રામ.

રામ’ શબ્દમાં ર, અ, મ – આ ત્રણ અક્ષરો છે. ‘ર’ એ અગ્નિનું બીજ છે. તે શુભ-અશુભ કર્મને બાળી નાખે  એ મંત્ર છે. ‘અ’ એ સૂર્યનું બીજ છે. તે મોહાંધકારનો નાશ કરે છે અને જ્ઞાનનો પ્રકાશ કરે છે. ‘મ’ એ ચંદ્રનું બીજ છે. તે ત્રિવિધ તાપ, આધિ, વ્યાધિ અને ઉપાધિને હરે છે. સર્વ પ્રકારના સંતાપને દૂર કરે છે. ‘ર’ કાર બ્રહ્મમય છે, ‘અ’ કાર વિષ્ણુમય છે. અને ‘મ’ કાર શિવમય છે. આ રીતે ‘રામનામ’ બ્રહ્મા, વિષ્ણુ અને મહેશનું સાક્ષાત સ્વરૂપ છે. ‘રામનામ’ એ ‘ઓમકાર’ સમાન છે. ઓમકાર જ બ્રહ્મા છે. ઓમકાર આત્મારૂપ છે. ઓમકારની ઉપાસના વ્રતધારી માટે સાક્ષાત્કારનું સાધન છે.

ઘણા પૂછે મંદિરોનું મહત્ત્વ શું?…માણસની   આધ્યાત્મિક જરુરિયાત માટે મંદિર જેવી સંસ્થાઓ બહુ જ જરૂરી છે.દેશની રક્ષા માટે જેમ મિલેટરીની જરૂર છે, તેટલી જ જરૂર સંસ્કારો માટે સમાજ ને છે. સંતો તેના પ્રોફેસરો છે. ગામે ગામ વિચરણ કરી , જન માનસને દૂષણોથી મૂક્ત કરવા ફરતા સંતોથી જ આ સંસ્કૃતિ ટકેલી છે. સાધુ સંતો સમાજના જ અંગો છે.કોઈ જગ્યાએ થોડી ક્ષતિ દેખાય તો પણ, આ પથ લોક-કલ્યાણનો છે.ભારત મંદિરોથી ઉજ્જવળ છે. શાળા, હોસ્પિટલની સાથે સંસ્કાર નહીં હોય તો વિનાશ નક્કી જ છેમનની શાંતિ વગર સુખ ક્યાંથી મળે?

આપણે  ભગવાનના દિવ્ય ગુણોને સ્મરીએ છીએજયશ્રી રાધાકૃષ્ણજયશ્રી સીતારામ મંત્રની જેમ જ..જયશ્રી સ્વામિનારાયણ મંત્ર માં એક તત્ત્વજ્ઞાન સમાયેલું છેભક્ત સહિત ભગવાનની ભક્તિ..

એટલે બ્રહ્મ અને પરહ્મમનર નારાયણની ઉપાસના જેવી. આવો સ્વામિનારાયણ ભગવાને જાતે જે મંત્ર જનકલ્યાણ માટે આપ્યો તે હેતે ભજીએ..જય સ્વામિનારાયણ

ભગવાન સ્વામીનારાયણ શ્રીવિષ્ણુના અવતાર માનવામાં આવે છે. તેઓ વર્ષ ૧૭૮૧માં અયોધ્યા પાસેના છપિયા ગામમાં રાત્રે ૧૦.૧૦ કલાકે માનવ સ્વરૂપમાં પ્રગટ થયા. તેમનું બાલ્યાવસ્થાનું નામ ઘનશ્યામ હતું. તેમનાં માતાનું નામ ભક્તિદેવી અને પિતાનું નામ ધર્મદેવ હતું.

તેમણે ઉદ્ધવ અવતાર સદગુરુ રામાનંદ સ્વામીનું શિષ્યત્વ સ્વીકાર્યું અને સહજાનંદ સ્વામી નામ ધારણ કર્યું. તેમના ગુરુદેવે તેમનું મહાસામર્થ્ય જાણી લઈને તેમને પોતાની ગાદીના ઉત્તરાધિકારી બનાવ્યા. તેમણે આપેલા ‘સ્વામીનારાયણ’ના મહામંત્રથી લાખો લોકો મંત્રમુગ્ધ થવા લાગ્યા. ગુજરાતમાં સતત ભ્રમણ કરીને લોકોનું નૈતિક, સામાજિક, આધ્યાત્મિક અને આર્થિક જીવનધોરણ ઊંચુ લાવવા માટે તેમણે ભગીરથ પ્રયત્નો કર્યા. ઉદ્ધવ સંપ્રદાય ‘સ્વામીનારાયણ સંપ્રદાય’ તરીકે વિશ્વમાં વિખ્યાત થયો.

આ દિવસ સ્વામીનારાયણ સંપ્રદાયના ભક્તો ધૂમધામથી ઊજવે છે. ભક્તો નિર્જળા ઉપવાસ કરે છે. ભગવાનની મૂર્તિને પારણામાં પોઢાડીને મંત્રોચ્ચાર અને આરતી કરવામાં આવે છે. ભગવાન ભક્તોને ચૈત્ર પૂર્ણિમા સુધી પારણામાં દર્શન આપે છે. તે દિવસે પંચજીરી (ધાણા, સૂવાદાણા, વરિયાળી, ટોપરૂં અને ગોળ)નો પ્રસાદ વહેંચવામાં આવે છે.

(આધાર- નેટ જગત.)

……………….

રામ નવમી

કેમ  રે  કહીએ ચંદ્ર આ વાતડી

તુજથી ભલી છે રે તારી ચાંદની

તમે  છો  રૂડા રૂડા મારા રામજી

પણ એથીય રૂડા તમારા નામજી

તમથી ભલી ચરણ રજ રામજી

અહલ્યાને કેવટ પામ્યા રે પાર

પ્રભુતા પખાળે માત ગોદાવરી

ચરણોએ પ્રગટ્યા તીર્થ અપાર

તમથી  ભલી  રે તમારી મુદ્રા

લાંગ્યા સાગર મૂકી મુખ માંહ્ય

તમથી ભલી શોભા ધનુષ્ય બાણની

અભય કીધા અરણ્ય દઈ છાંય

તમથી ભલા રે સ્નેહ  સીતાજીના

જંગલમાં  મંગલ  વર્ત્યા  ચોદિશ

હણી રાવણ પલટ્યા ભાગ્ય દેશના

પણ જાનકી થકી જ થયા રે ઈસ

તમથી  ભલી  આ  રામનવમી

અયોધ્યા નગરે પ્રગટ્યા રે દીપ

રમાડ્યા  દેવ  હનુમંતે  ઉરથી

રામકથા  અંતરે  પૂરે  રે છીપ

ધન્ય રામજી, ભાગ્યે ફળ્યા રે રામનામ

ભાવે વંદી ભજીએ જય જય સીયારામ

રમેશ પટેલ(આકાશદીપ)

……………………………

અજર અમર પદ દાતા રામ

ઢોલ  ધબૂક્યા અવધપૂરીએ ,પધાર્યા રઘુકુળે ચારો ચંદ
રાય  દશરથ  હરખ વધાવે, પ્રગટ  ભયો  કૌશલ્યા  નંદ
અંતર ચેતના  કરે આરતી, મંગલ સુમંગલ દીસે ચોદિશ
ધન્ય  ધરાતલ  પૂણ્ય ભૂમિ તું, રામ થઈને આવ્યા  ઈશ

ગગન   ગોખે   ઘૂમતા    ગરુડે,
રમતા   સદા  તમે  અંતરિયાળ
ચૈત્ર સુદ નવમીએ  થયા રામજી,
તો જાણ્યા કે કેવા હોય ભગવાન!

ચૌદ  લોકના  નાથ    વિધાતા,
ઘૂમાવો વિશ્વ અવિરત દિનરાત!
થયા  શીશુ  રામ,પણ  ન ભૂલ્યા
માગ્યો  રમવા  બ્રહ્માંડનો  ચાંદ

ગુરુ વિશ્વામિત્ર સંગ વને ચાલ્યા,
હણ્યા  આતતાયી  એકલ  હાથ
રઘુકુળ  રીતિ  સદા    પ્રમાણી,
અજર  અમર  પદ  દાતા રામ

સ્વયંવરે કીધું શીવ ધનુષ્ય ભંગ,
માત જાનકીના  થયા   ભરથાર
ત્યજ્યું  રાજસુખ   જગત  કાજે,
અર્પ્યું સુખ રામ રાજ્યનું સંસાર

રાજધર્મ  રઘુકુળ વચન વ્યવહારે,
નગર  ત્યજી  ચાલ્યા   વનવાસ
કેવટ  અહલ્યા ને માત શબરીના,
ભાવે  ભીંજાયા  લક્ષમણ   ભ્રાત

ધનુર્ધારી  રઘુવીર  ધર્મ ધુરંધર,
હણ્યો  દશાનન   લંકા    ધામ
મંગલ  પર્વ  દીપાવલિ   હરખે,
જનજન  સ્મરે જય  સીતા રામ

રામ  નામમાં  સઘળાં   તીરથ,
ગાયે  વાલ્મિકી  રામનાં  ગાન
રામ   લખન  જાનકીના  નાથ,
પાજો  સદા પ્રેરક  અમૃત પાન

રમેશ પટેલ(આકાશદીપ)

………………….

મંગલ વર્તે છપૈયા …

 

જગ કલ્યાણે જગે અવતરીયા,

જય મંગલ વર્તે છપૈયા 

તીર્થ ભૂમિના જાગ્યા સ્પંદન, 

જ્યાં ચરણ ચૂમ્યા સવૈયા

 

 

ભગવંત શ્રી સહજાનંદના રંગમાં

 રટે ગુર્જરી  સ્તુતિ

જય જય શ્રીસ્વામિનારાયણ મંત્ર

ઝૂકે શિશ અક્ષર મૂર્તિ

 

 

  

પાવન  દર્શને  દીપે   નમ્રતા  

સાધુતા  શોભંતી  જનહીતે 

પથપથ   વિચરે  ગુરુ   પરંપરા  

સંસ્કાર   ઝરણાં   મનમીતે

  

      દે આશિષ અંતરથી પ્રભુતા..હો કલ્યાણ અક્ષરવાસી 

      જય જય નિત રટજો મંત્ર, પઠે શ્રી સહજાનંદ સ્વામિ.

રમેશ પટેલ(આકાશદીપ)

ચૈત્રમાસ …ગુડી પડવો..પાવનતા પાથરતા આ માસનો મહિમા જ મોટો.

 હિંદુ નવા વર્ષની શુભેચ્છાઓ સાથે ..રામ લક્ષ્મણ જાનકી..જય બોલો હનુમાનકી.

ઓ ચૈત્ર સુધની……. છંદ-સુવદના

રમેશ પટેલ(આકાશદીપ) 

પ્યારું પંખી ટહુક્યું, અનુપમ સુખદા, છે વર્ષ નવલું
વાસંતી વાયરાઓ, લહર  ખુશનુમા, ભંડાર  ભરતા
વર્તે માંગલ્ય હૈયે, શુભદિન જ ગુડી, ચૈત્રી જ પડવો
લાગીને માત પાયે, નવનવ રજની, પ્રાથુ અભયદા

ઝૂમે  છે મીઠડી  , ઋતુ  સુમનધરી, પ્રસન્ન મન
ઝૂલે વૃક્ષો  ફળોથી, ખગશિશુ  ચહકે, વ્હાલે  મખમલી
પ્રગટ્યા  રામજીને, અવધ   પુનિતા, દૈવી યુગકૃપા
સીંચ્યા સંસ્કાર જીવે, સુદતિથિ નવમી, ને ધન્ય ધરણી

ચિરાયુ  શું  વખાણું, શતશત મુખથી, એવા બલયસી
ભેટ્યા  શ્રીરામજીને, યુગયુગ  હરખે,    કષ્ટહરણી
ખીલે  લાલી  ધરીને, કનકસમ નભે, સૂર્ય તપતો
છે ભાગ્યે પુણ્યવંતો, સ્તવન ગરબે, ચૈત્ર સુધની

રમેશ પટેલ(આકાશદીપ) 

રામાયણની થોડી નવલી વાતો..(દિવ્યભાસ્કર- આભાર) સાથે માણીએ…

 વાલ્મીકિ રામાયણમાં કેટલીક એવી રોચક વાતો જાણીએ….

– રામાયણ મહાકાવ્યની રચના મહર્ષિ વાલ્મિકીએ કરી છે. આ મહાકાવ્યમાં 24 હજાર શ્લોક, પાંચ સો ઉપખંડ તથા ઉત્તર સહિત સાત કાંડ છે. રાજા દશરથે પુત્રકામેષ્ઠી યજ્ઞ કરાવ્યો હતો …અને રામ, લક્ષ્મણ, ભરત અને શત્રુઘ્નનો જન્મ થયો હતો.

– વાલ્મિકી રામાયણ અનુસાર ભગવાન શ્રી રામનો જન્મ ચૈત્ર માસના શુક્લ પક્ષની નવમી તિથિને પુનર્વસુ નક્ષત્રમાં કર્ક લગ્નમાં થયો હતો. તે સમયે સૂર્ય, મંગળ, શનિ, ગુરુ અને શુક્ર ગ્રહ પોતાના ઉચ્ચ સ્થાન પર વિરાજમાન હતા અને લગ્નમાં ચંદ્રની સાથે ગુરૂ વિરાજમાન હતા.

ભરતનો જન્મ પુષ્યનક્ષત્ર તથા મીન લગ્નમાં થયો હતો, જ્યારે લક્ષ્મણ અને શત્રુઘ્નનો જન્મ આશ્લેષા નક્ષત્ર અને કર્ક લગ્નમાં થયો હતો. તે સમયે સૂર્ય પોતાના ઉચ્ચ સ્થાનમાં વિરાજમાન હતા.

તુલસીદાસ દ્વારા રચિત રામચરિત માનસમાં વર્ણન છે કે રામજીએ સીતા-સ્વયંવરમાં શિવધનુષ ઉઠાવી અને પ્રત્યંચા ચઢાવતા સમયે તૂટી ગયું હતું, જ્યારે વાલ્મિકી દ્વારા રચિત રામાયણમાં સ્વયંવરનું વર્ણન જ નથી.

રામાયણ અનુસાર જ્યારે ભગવાન રામ તથા લક્ષ્મણ ઋષિ વિશ્વામિત્રની સાથે મિથિલ પહોંચ્યા તો વિશ્વામિત્રએ જ રાજા જનકથી શ્રી રામને તે શિવધનુષ જોવા માટે કહ્યું. ત્યારે ભગવાન શ્રી રામે રમતા-રમતા જ તે ધનુષને ઉઠાવી લીધું અને તે તૂટી ગયું. રાજા જનકે સંકલ્પ લીધો હતો કે શિવજીનું ધનુષ્ય જે ઉઠાવશે અને તુટી જશે તે પોતાની પુત્રી સીતાના લગ્ન કરી દેશે.

– જે સમયે ભગવાન શ્રી રામ વનવાસ ગયા, તે સમયે તેની ઉમર 27 વર્ષની હતી.

-હિન્દુ ધર્મમાં 33 કરોડ દેવી-દેવતાઓની માન્યતા છે, જ્યારે રામાયણના અરણ્યકાંડના ચૌદમાં સર્ગના ચોદમા શ્લોકમાં માત્ર 33 દેવતા જ જણાવાયા છે. તેના અનુસાર બાર આદિત્ય, આઠ વસુ, અગીયાર રુદ્ર અને બે અશ્વિની કુમાર, આ જ કુલ 33 દેવતા છે.

– સીતાહરણ કરતા સમયે જટાયુ નામના ગીદ્ધે રાવણને રોકવાનો પ્રયત્ન કર્યો હતો. રામાયણ અનુસાર આ જટાયુના પિતા અરૂણ જણાવાયા છે. આ અરુણ જ ભગવાન સૂર્યદેવના રથને સારથી છે.

જે દિવસે રાવણ સીતાનું હરણ કરી અશોકવાટિકામાં લાવ્યો, તે રાતના ભગવાન બ્રહ્માનું કહેવાથી દેવરાજ ઈન્દ્ર માતા સીતા માટે ખીર લઈને આવ્યા, પહેલા દેવરાજે અશોકવાટીમાં રહેલા બધા રાક્ષસોને મોહિત કરી સુવડાવી દીધા, ત્યાર પછી માતા સીતાને ખીર અર્પણ કરી કે જેના ખાવાથી સીતાજીની ભૂખ-તરસ શાંત થઈ ગઈ.

-જ્યારે ભગવાન રામ અને લક્ષ્મણ વનમાં સીતાની ખોજ કરી રહ્યા હતા. તે સમયે કબંધ નામના રાક્ષસનો રામ-લક્ષ્મણે વધ કર્યો. ખરેખર તો કબંધ એક શ્રાપના કારણે આવો થઈ ગયો હતો. જ્યારે રામે તેના શરીરને ભસ્મ કર્યું તો તે શ્રાપથી મુક્ત થઈ ગયો. કબંધે જ રામને સુગ્રીવ સાથે મિત્રતા કરવાનું કહ્યું હતું.

રામાયણ અનુસાર સમુદ્ર પર પુલ બનાવવામાં પાંચ દિવસનો સમય લાગશે. પહેલા દિવસે વાંદરાઓએ 14 યોજન બીજા દિવસે 20 યોજન, ત્રીજા દિવસે 21 યોજન, ચોથા દિવસે 22 યોજન અને પાંચમા દિવસે 23 યોજન પુલ બનાવ્યો હતો. આ પ્રકારે કુલ 100 યોજન લાંબો પુલ સમુદ્ર પર બનાવ્યો હતો. આ પુલ 10 યોજન પહોળો હતો.

-એકવાર રાવણ કૈલાસમાં ગયો તો તે નંદિને જોઈને હસવા લાગ્યો અને નંદિને વાંદરા જેવા મુખ વાળો કહ્યો તેથી ક્રોધિત થઈ નંદીએ શ્રાપ આપી દીધો કે વાંદરના હાથે તારું સર્વનાશ જશે

બહેન શુર્પર્ણખાનો પતિ વિદ્યુતજિવ્હ હતો. તે કાળકેય નામના રાજાનો સેનાપતિ હતો. રાવણ જ્યારે વિશ્વયુદ્ધ પર નીકળ્યો તો કાળકેય સાથે તેનું યુદ્ધ થયું. તે યુદ્ધમાં રાવણે વિદ્યુતજિવ્હનો વધ કર્યો. ત્યારે શૂર્પર્ણખાએ મનમાંને મનમાં રાવણને શ્રાપ આપ્યો કે મારા કારણે તારો સર્વનાશ થશે

………………….

ભારત ભોમની ચેતના રામ…

રમેશ પટેલ(આકાશદીપ) 

કૌશલ્યા- દશરથ નંદન રામ, પરદુઃખ ભંજક ભ્રાતૃ રામ

રાજા રામ ;વનવાસી રામ, ઋષીઓની શ્રધ્ધા તું રામ

 

અહલ્યા ને શબરીના રામ, ધર્મ ઉધ્ધારક તું સીતા-રામ

દાતા રામ ગુણી શાતા રામ, દીન દુખીયાના બેલીરામ

 

જટાયુ ને સુગ્રીવ મિત્ર જ રામ, દૈવી પથડે દોરે શ્રી રામ

ધનુષ્ય બાણે  શોભે શ્રીરામ, ધર્મ ઉધ્ધારક રઘુવંશી રામ

 

ઉઠતાં રામ સંવરતાં રામ, જનજન ઉરમાં વસતા જ રામ
 અભિમાનીનો અંત જ રામ, હનુમંત બોલે જય સીયા-રામ

 

જીવન મંત્ર વિભિષણ રામ, રામ સેતુનો  રામેશ્વર  રામ
 ઋષી વાલ્મીકિએ જાણ્યો એ રામ, પંચવટીનો મીઠડો રામ
 

જીવન શ્રધ્ધા, જીવન સત્ય, ભારત ભોમની ચેતના રામ
ભલો રામ,મારો ભોળો રામ, અજર અમર પદ દાતા રામ

………………….

30) ધન  ધન તમારી ઠકુરાઈ.…..

રમેશ પટેલ(આકાશદીપ) 

જાગી  પુનઈ  પ્રગટી  વડાઈ

રઘુકુળ રીતિ વચન સચ્ચાઈ

રામજી, ધન ધન તમારી ઠકુરાઈ

અભયદા   સિયારામ   સુભાષી

રાજધર્મની   શોભા    છલકાઈ

પિતૃ-બંધુ ધર્મની દીપી ખરાઈ

રામજી, ધન ધન તમારી ઠકુરાઈ

ધીર  વીર    વત્સલ   સુહાસી

વચનકાજ   હાલ્યા   રઘુરાયી

કેવટ  પામ્યો  ભવ   ઉતરાઈ

રામજી, ધન ધન તમારી ઠકુરાઈ

ઋષિ  વનવાસી  સૌ  સુભાગી

વનપથે  વિચરે  પૂણ્ય કમાઈ

યશોધર શુભંકર ધર્મ ધુરંધર

દશાનન  સંગ   છેડી  લડાઈ

રામજી, ધન ધન તમારી ઠકુરાઈ

રામ  લખન  સુગ્રીવ  હનુમંતા

ભરત  શત્રૃઘ્ન  ભાઈ બલવંતા

અવધ ઝીલે વિજયઘોષ દુહાઈ

ઋષિ   વાલ્મિકી   ગાયે   ચતુરાઈ

રામજી, ધન ધન તમારી ઠકુરાઈ